اسلام آباد (ڈیلی پاکستان آن لائن )اسلام آباد میں آنے ہونے والے جلسے کے لئے پاکستان تحریک انصاف کی قیادت نے کارکنوں کو اہم ہدایات جاری کر دیں۔
پاکستان تحریک انصاف کی جانب سے آج اسلام آباد کے نواحی علاقے سنگجانی میں جلسہ کیا جا رہا ہے جس کے لئے ملک کے مختلف شہروں سے کارکنوں کی آمد کا سلسلہ جاری ہے۔جڑواں شہروں راولپنڈی اور اسلام آباد میں سڑکوں کو جگہ جگہ کنٹینر لگا کر بند کر دیا گیا ہے اور اسلام آباد انتظامیہ کی جانب سے پی ٹی آئی قیادت سے جلسے کی اجازت کے لئے ملنے والی این او سی پر سختی سے عمل درآمد کا کہا گیا ہے۔
پی ٹی آئی قیادت نے کارکنوں کو کسی بھی صورتحال میں اسلحے کا استعمال نہ کرنے اور مشکوک افراد پر کڑی نظر رکھنے کی ہدایات جاری کی ہیں۔قیادت کی جانب سے مقامی عہدیداروں کو قافلے میں شامل لوگوں پر کڑی نظر رکھنے کا ٹاسک سونپ دیا گیا ہے، عہدیداروں کو ہدایات جاری کی گئی ہیں کہ مشکوک شخص نظر آئے تو فوری طور پر اسے پکڑا جائے۔
پی ٹی آئی رہنماوں کو یہ ہدایات بھی جاری کی گئی ہیں کہ جلسے میں کسی قسم کی بدامنی نہیں ہونی چاہئے، یوتھ ونگ ماسک، نمک اور شیلنگ سے بچاوکے دیگر آلات اپنے ساتھ رکھیں۔
پی ٹی آئی ذرائع کا بتانا ہے کہ راستے میں آنے والی رکاوٹیں ہٹانے کے لئے قافلوں میں کرینز، واٹر کیننز اور دیگر مشینری بھی شامل ہو گی۔