اسلام آباد (ڈیلی پاکستان آن لائن )اسلام آباد میں پاکستان تحریک انصاف( پی ٹی آئی) کے جلسے کی وجہ سے اسلام آباد اور راولپنڈی کے متعدد راستے بند ہیں۔
اسلام آباد کی ٹریفک صورتحال کو دیکھا جائے تو میٹرو بس سروسز بشمول ریڈلائن،گرین لائن،اورنج لائن،بلیولائن بند ہیں، اس کے علاوہ فیڈر روٹس اور پنک بس سروس بھی بند ہیں، اسلام آبادایکسپریس وے کے دونوں اطراف اور لہتراڑ روڈ سے کھنہ پل پر راستہ بند ہے۔
سری نگر ہائی وے دونوں اطراف ٹریفک کے لئے کھلی ہے، اسلام آباد ایئرپورٹ جانے اور واپس آنے کےلئے سری نگر ہائی وے کا استعمال کیا جا سکتا ہے۔
راولپنڈی ریلوے سٹیشن سے سری نگر ہائی وے، فقیر ایپی روڈ، آئی جے پی روڈ سے پشاور روڈ تک جا سکتے ہیں، اسلام آباد پہنچنے کے لئے بھارہ کہو کا داخلی راستہ سترہ میل پر بند ہے۔ٹیکسلا سے جی ٹی روڈ سنگجانی پوائنٹ پر جی ٹی روڈ دونوں اطراف کی ٹریفک کے لئے بند ہیں، ہفتہ وار لگنے والا اتوار بازار معمول کے مطابق کھلا ہے۔
ریڈزون میں آنےجانے کے لئے مارگلہ روڈ استعمال کیا جا سکتا ہے، دیگر تمام داخلی اور خارجی راستے بند ہیں۔ موٹروے ایم 1 اور ایم 2 ٹریفک کے لئے کھلی ہیں ،سری نگر ہائی وے سے موٹروے تک راستہ کھلا ہے۔
اس کے علاوہ موٹروے ایم 2 اسلام آباد جانے والی سائیڈ بند کردی گئی ہے، موٹروے ایم 2 لاہور جانے والی لین ٹریفک کے لئے کھلی ہے، کلرکہار، بلکسر اور نیلا دلہہ انٹرچینج پر رکاوٹیں کھڑی کر دی گئی ہیں۔پولیس کی بھاری نفری موٹروے انٹرچینجز پر تعینات ہے جبکہ سڑکوں کی بندش کی وجہ سے اسلام آباد جانے والے مسافروں کو سفری مشکلات درپیش
ہیں۔