لاہور )سیکرٹری داخلہ پنجاب کی ہدایت پر محکمہ داخلہ نے پنجاب ای انوینٹری مینجمنٹ سسٹم متعارف کروا دیا ہے۔ جدید سسٹم کی بدولت محکمے کی تمام پروکیورمنٹ اور دستیاب وسائل بارے رئیل ٹائم مانیٹرنگ ممکن ہو گئی ہے۔ محکمہ داخلہ اور اٹیچڈ ڈیپارٹمنٹس کے 5 ارب روپے مالیت کی پروکیورمنٹ کا ریکارڈ ای انوینٹری سسٹم میں دستیاب ہے۔ محکمہ داخلہ پنجاب کے جدید ای انوینٹری مینجمنٹ سسٹم میں 19000 سے زائد ایسٹس کا ریکارڈ درج کیا گیا ہے
ترجمان کے مطابق محکمے میں دستیاب کاغذ قلم سے لیکر جدید سائنٹفک مشینری تک کا ریکارڈ سسٹم میں درج کیا گیا۔ جدید سسٹم کی بدولت محکمے کے ہر آفیسر اور عملے کے زیر استعمال اشیاء اور وسائل دیکھے جاسکتے ہیں۔ تمام افسران اور عملے کے زیر استعمال اشیاء کے علاوہ سٹور میں موجود وسائل بارے بھی رئیل ٹائم معلومات دستیاب ہونگی۔ ای انوینٹری مینجمنٹ سسٹم کی بدولت محکمانہ آڈٹ میں سہولت اور شفافیت یقینی بنائی گئی ہے۔ اسی طرح محکمے میں دستیاب وسائل کا ریکارڈ آئیندہ کیلئے بجٹ پلاننگ میں بھی معاون ہوگا۔
سیکرٹری داخلہ پنجاب نے تمام ملحقہ اداروں میں ای انوینٹری مینجمنٹ سسٹم لانچ کرنے کی ہدایت کی تھی۔ اپنی طرز کے پہلے اور منفرد انوینٹری مینجمنٹ سسٹم کو محکمہ داخلہ کی آئی ٹی ٹیم نے تیار کیا ہے۔ محکمہ داخلہ نے بغیر کسی اضافی خرچ کے صرف 3 ہفتوں کے مختصر عرصے میں اپنے وسائل سے انوینٹری مینجمنٹ سسٹم تیار کیا۔ سیکرٹری داخلہ کی ہدایت پر محکمے کی آئی ٹی ٹیم تمام اٹیچڈ ڈیپارٹمنٹس کو جدید سسٹم کے استعمال بارے تربیت دے رہی ہے۔